पुणे (livemaharashtra.co.in) पुणे शहरातील मध्यवर्ती भागातील शाळा या महत्त्वाच्या रस्त्यांवर आहेत. लक्ष्मी रस्ता, टिळक रस्ता, कुमठेकर चौक, केळकर रस्त्यावर प्राथमिक, माध्यमिक शाळा असून, या रस्त्यांवर वाहनांची वर्दळ कायम असते.शाळेला जाताना आणि शाळा सुटल्यानंतर विद्यार्थ्यांना वाहतूक कोंडीचा सामना करावा लागतो. या पार्श्वभूमीवर विद्यार्थ्यांच्या सुरक्षेसाठी पुणे महानगरपालिका आणि वाहतूक पोलिसांनी शालेय वाहतूक धोरणांतर्गत विशेष प्रकल्प सुरू केला आहे. त्यांच्याकडून शाळा परिसरात रस्त्यांवर चिन्हांकित आकृती काढण्यात येत आहे. त्यामुळे वाहनचालक या भागात आले, की त्यांना वाहन सावकाश चालविण्याची सूचना ठळकपणे मिळणार आहे.
पुणे महानगरपालिका आणि वाहतूक पोलिसांनी शालेय धोरणाअंतर्गत सुरू केलेल्या या विशेष प्रकल्पाला वाहन चालकांकडून चांगला प्रतिसाद मिळत आहे. शाळेबाहेरील रस्त्यांवर ३० फुटांपर्यंत पांढऱ्या, पिवळ्या रंगाच्या नक्षीमुळे वाहनचालकांना शाळा असल्याचे लक्षात येणार आहे.शाळा सुटण्यापूर्वीच नाही, तर इतरवेळी देखील शाळेचा परिसर असल्याचे स्पष्ट होऊन वाहनचालकांना वेग कमी करण्याचे संकेत मिळणार आहेत. वेग नियंत्रित झाल्याने अपघात किंवा अडचण न राहता सुरक्षितता निश्चित करता येणार आहे.
शहरातील मध्यवर्ती असणाऱ्या शाळा परिसरात शालेय विद्यार्थ्यांसह वाहतुकांची मोठ्या प्रमाणात असते. बऱ्याच वेळा या वर्दळीच्या ठिकाणी अपघात होण्याची शक्यता देखील असते.या पार्श्वभूमीवर महापालिका आणि वाहतूक पोलिसांनी एकत्रित येऊन प्रमुख शाळांबाहेरील रस्त्यांवर ठरावीक दोन रंगांची नक्षी काढून वाहनचालकांना पूर्वसूचना देण्यासाठी प्रयत्न सुरू केले आहेत.
